Infoikastola

Urtarrilaren 30ean abiatuko da matrikula kanpaina

Wed, 25 Jan 2012 09:40:08 +0000

    Urtarrilaren 30etik otsailaren 10a arte, 2 urtetik 16 bitarteko ikasmailatan matrikulatzeko epea zabalduko da. 2012/2013 ikasturtean lehenbiziko aldiz ikastolako edozein mailatan matrikulatuko diren ikasleei zuzendutako kanpainarako “Bularretik mundura” leloa aukeratu dugu, Ikastolan gauza daiteken 0 urtetik 18 urte bitarteko ibilbide akademikoa islatzeko. Ikastolan egun dauden urte bateko haurrak eta Batxilergoko neska-mutilak bihurtu ditugu kanpainako protagonistak. Erreportaia www.laudioikastola.net gunean ikus daiteke.
    0-2 Zikloan hasteko diren haurrak dituzten Ikastolako familiei matrikulatzeko asmoa ahalik eta arinen helaraztearen garrantzia gogoratu behar diegu.
    Matrikularen inguruko informazio gehiago Ikastolako idazkaritzan, 94 672 67 37 telefonoan eta www.laudioikastola.net web gunean eskainiko dizugu.

VIII. SAHARAREN ALDEKO EUSKAL KARABANA

Wed, 25 Jan 2012 09:40:08 +0000

Aurreko urteetan bezala, VIII. Sahararen Aldeko euskal karabana: “piztu itxaropena“ ekimena abian dago, Sahararen Aldeko Euskal Koordinakundeak antolatua eta Euskal Fondoaren laguntzaz. 2012ko otsailean aterako den karabana honen helburu nagusia Saharako errefuxiatuei ahalik eta elikagai gehien eramatea da, Tindufeko (Aljeria) errefuxiatuen kanpamenduetan pairatzen duten elikagai falta asetzeko nahian. Aurten atuna eta sardinak oliotan, azukrea, pasta, arroza, lekaleak (dilistak, e.a.) eta konpresen bilketa proposatu digute.
Gure Ikastolan, aukera izango duzue urtarrilaren 27ra arte, ostirala arte, aurretik aipatutako produktuak ekartzeko.

GURASOLAGUN EKIMENAREN HITZORDUA URTARRILAREN 27AN BASALARRINA ELKARTEAN

Wed, 25 Jan 2012 09:40:08 +0000

Basalarrina Elkartean burutuko da urtarrilaren 27an 17:30etik 19:00era Gurasolagun ekimenaren lehen hitzordua. Etxeko guztien partaidetza ahalbide-tzeko bertora hurbiltzen diren umeentzako tailerra izango da berton gurasoek euskararen erabilpena sustatzeko ekimen honen nondik norakoak aztertzen dituzten bitartean.

INAUTERIAREN PRESTAKUNTZA LEHEN HEZKUNTZAN

Wed, 25 Jan 2012 09:40:08 +0000

    Gabon festak pasa ondoren, inauteriko garaia heltzen ari zaigu. Aurtengorako, Lehen Hezkuntzako etapan “Historiako aroak” antzeztea erabaki dugu, eta hona hemen, ideia bat egiten joan zaitezten, maila bakoitzari dagokion aroa:

1.MAILA :LEHEN GIZAKIAK

2.MAILA: AINTZIN AROA (ERROMA)

3.MAILA:ERDI AROA

4.MAILA:ARO MODERNOA

5.MAILA :ARO GARAIKIDEA

6.MAILA:ETORKIZUNA

    Datorren astetik aurrera,ikasleen bitartez, bidaliko zaizkizue mozorroaren zehaztapenak.

    Besterik gabe,ondo izan eta inauteriko festan parte hartzeko prestatzen joan.

INAUTERIAREN PRESTAKUNTZA HAUR HEZKUNTZAN

Wed, 25 Jan 2012 09:40:08 +0000

    Datorren Otsailaren 17an, Inauteriak ospatuko ditugu eta 3,4 eta 5 urteko neska-mutilak ARRANTZALE mozorrotuko gara.

    Janzteko, marradun kamiseta edo jertsea. Praka bakero edo urdinak. Oinetarako katiuskak. Arrantzale zapi bat lepoan lotzeko eta bururako artilezko txanoa beharko ditugu. Gainetik, plastiko horia eramango dute, ikastolan jasoko duzuena.

    4 eta 5 urtekoek makila labur bat beharko dute kainabera egiteko. Arrainak ikastolan egingo ditugu. 3 urtekoek kainaberarik ez dute eramango.
Ume bakoitza bere itsasontzi barruan joango da. Itsasontzia ere etxean egingo da.

    Egun horretan, jantokikoak, poltsa baten ekarriko dute mozorroa, eta besteak arratsaldez etxetik jantzita etorriko dira.

    Urtero bezala eredu bat izango dugu sarreran zuek ikusi al izateko, beraz nahi izanez gero urtarrilaren 30etik aurrera han izango duzue.